Doo gseet me numme, wie häikel as mit öiser Mundart mängisch isch. S Züri oobe sääge die däm apsunderlige Schneemaa, wo sii ammen im Früelig verbrenne, Böögg. Will s Baaselbiet s neecher Joor Gaschtkanton am Zürcher Sächsilüten isch, chunnt dä, oder besser gsäit d Chürpse vonem, jetz für es halbs Joor zu öis in es Museum. E gueti Sach, denn chaa men e Zürcher äinisch e chlyy vo nööcher aaluege. Wenn daas überhaupt öbber will. En anderi Sach isch denn aber schon e chlyy häikler. Stelled öich voor, mir würde de Zürcher, as Dankschöön, daas schicke, wo mir under emene Böögg verstönde. Gruusig, gälled. Aber soo goots halt, wenn me zwee verschiidene Sache glyych säit. Und as denn klaar isch, mir häi eender Böögg gsäit as d Zürcher.
Böögg = Nasenpopel
Chürpse = Kopf
