Wenns häisst zäävoorachti, denn isch au zäävoorachti gmäint. Und nit ölfvoorachti oder emäänd viertelvoorachti.
Am zäävoorachti wird uufgmacht. Soo stoots an dr Düre vom Byyljieeschlater vo der SBB am Baanhoof z Sissech.
Es spiilt au käi Rolle, wenn öbber s Byyljiee nit will oder chaa an deene «print screen» Vorrichtige voorussen uuseloo. Äiwääder bisch nit z blööd, an somene Chaschte dyys Byyljiee z lööse oder de muesch halt warte, bis dr öbber vom Yysebaanpersonaal – eben am zäävorachti – d Düren uufduet. Es nützt au nüt, wenn dinnen im Byyljieeschalter gseesch Lüt in himmelblauen Uniformen ummehüenere und den an d Schyybe bolderisch. Das hed der Scheff vo de Blaue nämmlig gaar nit gäärn. Denn chaas dir nämmlig bassiere, as der Scheff sälber – eben am zäävoorchati – uusechunnt und dir no Schlötterlig aahänkt.
Doorum. Zäävoorachti isch zäävoorachti.
Byyljiee = Billett
äiwääder = entweder
