Doo bin ich aber e chlyy verschrocke. Won ich nämmli do letschti amene Zyttigsstand duuregloffe bii, han ich e Schlaagzyyle glääse: „Die NASA verabschiedet sich vom Mond“. Myy erschte Gedanken isch gsii, wo aane goot ächt jetz de Moond. Uf Wollerau oder Freiebach, wääge de Stüüre? Aber dr Moond zaalt allwääg käini Stüüre. Wäm au.
Äinewääg. S weeri sicher schaad, wenn dr Moond underäinisch nümme doo weeri. Denn weers jo duraane chyttig. Guet. Daas geengti jo no. S git jo Sacklämpli. Vill schlimmer weeri nämmlig, as ich mit myynere Liebschte käini Moondschyynspaziergäng me chönnti mache.
Ou. Jetz han ich aber wiider öbbis gschriibe. Ich ghöör nämmlig myy Frau scho muule, wenn sii daas liist: Mondschyynspaziergäng?
chyttig = stockdunkel
Sacklämpli = Taschenlampe
