Sit langem macht me sich schyyns Gedanke, was die letschte Woort vom Churchill gsii syyge.
Dir glaubeds nit. Ich chas öich sääge. Käini grosse Wort hed er verloore. Syy letschte Doon isch es schüüchs «pieps» gsii, und denn hed är die Wält verloo.
Ich ha dr Churchill e baar Mool ghüeted. Ich han iim fyyn gschyybleti Gällerrüebli oder Blättli vom Haabermarch gfuered. Öbbe zwüscheduure, wenns öbbis ganz Bsundrigs hed dörfe syy, hed er Ändyyvi überchoo. Er hed sich jeedes Mool gfröit, wenn ich en bsuecht ha, und er isch, no im hööchen Alter, wien e Jungen ummeghüpft. Wenn mes Ässe nit gläitig gnue yynegeeh hed, hed er mängisch chönne zimmlig blööd due. Ich glaub aber, zum Schluss syy mir zwee fascht so öbbis wie Fründ gsii.
As ich s nit vergiss. Dr Churchiill isch d Wüeschtespringmuus vo öisne Noochbere gsii, wo do letschti s Zyytlig gsäägned hed.
Haabermarch = Wiesen-Bocksbart
Ändyyvi = Endivie
