Es isch jeedes Joor s Glyychlig. Um öis umme wird gäärnted. Ganzi Wälder vo Chruttstiil, Guggummere, Ziibele, Fänchel, Zwätschge, Stangeboone und e huffen anders wird yygfaare. Es wird wie lätz deert, yygfroore, yygmacht, yygchocht.
Das isch jo guet und rächt. Soo syy d Huusfraue beschäftiged.
Aber denn chunnt das, wo öisi Huushaltsblaanig zümpftig zunderopsi wiirpled. Vo allne Sytte chömme mir, dir häits verroote, Chruttstiil, Guggummere, Ziibele, Fänchel, Zwätschge, Stangeboone über. Mir chömme nümme nooche mit ässe. Mir haabere jeede Daag drüümool Gmües. Mir ässen schon lang nümme was mir wäi. Näi. Mir verpfläägen öis mit dem, wo öisi Bekannte z vill aapflanzt häi. Ich chumm mir e chlyy vor, wien e Chüngel wo gmeschted wird.
Aber wie säit mit Frau: Gscheech nüt Schlimmers! Rächt hed syy – wie immer!
Chruttstiil = Mangold
Guggummere = Gurke
deere = dörren
