Aso, so richtig verbyy isch sii noonig. Bi villne Clique, Waagegruppe, Guggemuusigen und wyttere Sumpfbrüeder und -schwöschtere chunnt nämmlig jetz no die gföörchtedi Lämpesitzig. An deere Zäämekumft isch denn albe fertig luschtig. Es chaa nämmlig jeeden und jeedi früsch vo der Lääberen ewägg sääge, was iim oder iiren an der Faasnecht nit in Chraage basst hed. I chaan öich sääge, wenn diir äinisch bi sonere Chropfleerede derbyy gsii syt, denn meerked dir glyy, ass an der Faasnecht äigedlig nüt z lache git. E doodäärnschti Sach! Däilwyys gönge sii uufenander loos wie düppelhürnigi Wildsöi. Was die enander alles an Chopf bängle!
D Clique
Au hüür wiider hed der Voordraab d Drummler und Pfyyffer im Gaggoo ummegfüert. Guet, es isch au efange nümm äifach. Wil men in der Müli vor luuter Bouabschrankigen und Pföschte fascht nümme durechunnt, hed me müesen as Faasnechtsclique de Wänd noocheschlyyche. Doo derbyy isch me z nooch an Dachchäänel choo, und s hed e Schranz in d Ladäärne gee. Überhaupt. Der Voordraab. Äntwääder häi die Tschalpi Mäis underenander. Oder no schlimmer, s foot irgend sone Gumsle miteme Drummler es Gschläiff aa.
D Waageclique
Der äint hed d Zoggeli falsch aagmoolt ghaa. Das geecht jo no. No schlimmer isch gsii, ass am Umzug nach halbem Wääg nüt me zum Uuseschiesse ghaa hed. Nummen non e baar pflüttrigi Orange. Aber s Allerschlimmscht syygi hüür gsii, ass d Stereoaalaag uf em Waggiswaage der Gäischt uufgee häig. Guet, jetz chaa me sich natüürlig frooge, worum s um s Verwoorggen e Stereoaalaag ufeme Waggiswaage bruucht. Aber daas isch wiider en anderi Gschicht!
D Guggemuusige
Vo deene syy die mäischten an der Sissecher Faasnecht scho zimlig uf der Schnure. S wiird doorum drüber noochedänkt, as Gugge vo jetz aa numme no an öppe 83 Voorfaasnechts-Veraastaltige mitzmache.
D Schyyssdräckzügli
S Mutti hed wiider äinisch mee vergässe, sich bi der Faasnechtsgsellschaft für en Umzug aazmälde. Und wäge däm chömme sii au hüür die achtfrankefümfezwänzg Subvention nit über.
D Chienbääseler
Jeedes Joor s Glyychlige. Nie wüsse die aarme Döifel, wenn sii setten apmarschiere. Und soo stönde si wie bstellt und nit apghoolt umme. Die glüenige Chienspöön gheien iinen uf e Chopf und der Bääse wiird allsbott schweerer. Wenn sii denn äntlig chönne loosdrotte, syy si äntwääder z früe oder z spoot.
D Chluuribouer
Die Burschte syy hüür ganz zum Hüüsli uus gsii. Es Chluuri dur e Strichcode z chäärle, wo nit der Grind aaschloot an de Drööt, isch käi lyychti Uufgoob gsii. Wil jo in der Begeegnigszoone d Drööt mit de Lattutere draa vill wytter aabebambelen as früeijer, häi sii es chlyyners, es chopflooses Chluuri müese boue.
Dir gseejed, es git no vill zum Noochedänke. Doorum: Bis an d Lämpesitzig vom nööchschte Joor.
düppelhürnig – einfältig
Chienspöön – Kienspäne
