Het me s däim oder diisere schon emool gseit? Ich mein, däim oder diisere, wo d Verpackig vom «GALA-Cheesli » uusdüftelet hed.
Wenn nit, isch s höchschti Zytt. Dä oder die hätt nämmlig der Verpackisnobelpryys verdient.
S goot so äifach. De chnüüblisch also son es dreieggigs Cheesli zum Druckli uus, ziesch süüferlig am roten Alufaade – und es chlyys Wunder isch gschee.
Ooni as de chlääbrigi oder cheesige Döbbe hesch, lytt äiswäggs es blutts GALA-Cheesli vor dir. Nit so wie bi andere Verpackige, wo de zerscht muesch e Hochschuelabschluss machen oder e Schachtle Valium zur Beruig nee. Nei. Au ich mit zwee lingge Düüme has Cheesli uuspackt, ooni vorhäär z verhungere. Alli die, wo mi schon emool gsee häi e Naagel yyschloo, wüsse vo was ich reed.
Aso, dänket draa, wenn dr s nächscht Mool es GALA-Cheesli uuspacket. Es chönnt au anderscht umme syy.
uusdüftele = ausdüfteln
Druckli = Schächtelchen
äiswäggs = plötzlich
