Jetz wiird also begeegned – um s Verwoorggen und ooni Rücksicht uf Verluscht! Fertig mit ummeneerggere.
Hejoo, es isch au woor. Was syy miir doch die letschte sächs Mööned z Sissech nit im Gaggoo ummegschuened. Für gon e Schniifel Schwartemaage z boschte, heds e soumeessig gschickti Blaanig bruucht. Nüt doo, äifach ins Doorff tschalpe. De hesch der Chopf müese bi der Sach haa. Und was s alles bruucht hed, ass di im Doorff zrächt gfunde hesch. As Eerschts hesch s nöischt Chaartematerial bruucht. Chaarte, wo jeede Randstäi und die chlyynschte Hübel yyzäichned gsii syy. Es hed der nämmlig chönne bassiere, ass am Moorgge fascht ine Bougruebe gheit bisch und ass zooben am glyychen Ort underäinisch e Muure gstanden isch. Käi Bsetzistäi isch nämmlig uf em andere bliibe.
Ganz wichtig isch au guets Schuewärch gsii. Nit esoo apgloffeni Häilandsandaale. Näi. Am beschte Bäärggschue. Öppe settigi, wo der Reinhold Messner bi syynen Eerschtbestyygige scho bruucht hed. Es isch au nit schlächt gsii, wenn den immer Styygyysen uf Maa ghaa hesch.
Öppis wytters Wichtigs, wo de bi däm däägligen Orientierigslauf bruucht hesch, isch Uusduur, gueti Gsundhäit und e Kondition wiene Wellofaarer an der Tour de France. Es häigi schyynts Lüt gee, wo sich mit verbottnige Sache «doopt» häige – mit Bruschttee, Essigsogge, Ziibelewiggel und söttigem gruusige Züüg.
As nööchschti Zläidlääberei hesch denn e Zytt lang vor de Gschäfter müese, oder besser gsäit hättsch selle, über e roote Deppech düüssele. Es isch aber nit lang gangen und die Deppech syy verrumpfled gsii, wie wenn sen e Chue im Muul ummedrüllt hätti. Und de hesch Glück ghaa, wenn de nit über d Rümpf gstolpered bisch und s di uf e Sack ghaue hed. Aber au daas hesch in Chauf gnoo.
As Zuegoob hed me bim Grüble, nääben em Huus vom Diamantehändler, underäinsich en alte Soodbrunne gfunde. Mängisch isch s halt scho guet, me goot in d Dieffi und charschtled nit nummen an der Ooberflechi.
E wyttere, groosse Momänt isch s Boustellefescht gsii. Nit ass de besser durechoo weersch. Bigoscht nid. Es hed äifach none baar Sache mee ghaa, wo im Wääg ummegstande syy. E Dampfwalzi, Laschtauti, Bagger und e Kraan. Numme Schuufle haani käini gsee. Öb d Stroossebouer emänd gaar nümm schuufle?
Süüferlig hed aber d Begeegnigszoone «Strichcode» Gstalt aagnoo, numme no äinisch underbroche vomene Boustellefloomäärt.
Aber denn isch alles guet gsii. Und ass alles so guet uusechoo isch, häi miir – under anderem – em Sunnestammdisch, däm vorusse nääbe der Stääge, z verdanke. Die häi nämmlig die häimligi Ooberbouläitig ghaa und immer wiider yygriffe, wenn öppis lingg gangen isch – ämmel theoretisch.
Und doorum isch jetz fertig mit däm In-der-Geegend-Ummejoggle. Fertig mit Ummenanderlaaferen und Ummeniire. Jetz wiird, wie gsäit, begeegned. Guet. Velicht will iich em äinten oder der andere gaar nit begeegne. Aber das nimmt niemer wunder. Nüt doo. Me hed schlussemänd e Huffe Gäld uusgee! Und doorum wiird jetz begeegned. Fertig. Schluss.
Gaggoo – unwegsames Gelände
düüssele – schleichen, auf leisen Sohlen gehen
