Hür gääbis weniger Chiirssi as fäärn. S Wätter – für äinisch nit d Ussländer – syygi schyyns tschuld.
S gitt halt jetz äinisch weniger Chiirssiwäien oder Chiirssipfäffer. S Chiirssistäiseckli, wo mir dr Göttibueb scho lang hett welle schänke, chan er au nit mache. Er hett nit gnueg Chiirssistäi. Woorschyynlig muess sogar d Chiirssistäispöi-Olympiade verschoobe wäärde.
Aber das isch alles nitt s ärggscht.
Wenn s nämmlig weniger Chiirssi gitt, gitts au weniger Chiirssiwasser.
Jawoll, dir häits gmerkt.
Was ryybe d Buure denn de Chüe, wenn syy Gsüchti häi – d Chüe, nit d Buure – yy?
As an deere Stell äinisch für immer gsäit isch: Näi. D Buure drinke s Chiirssiwasser nit säälber. Was glaubet dir äigedlig. Käi Schluck nämme die. Die bruuche das brennt Wasser numme für die chranke Chüe. Oder geege d Gsüchti. Ussnaamswyys. Säit men ämmel.
Chiirssiwasser = Kirsch
Chiirssipfäffer = geröstete Brotwürfel, Mehl und gekochte Kirschen
Gsüchti = Rheumatismus
