De verchlöpfsch halt schon e chlyy.
D Dür vom Dramm goot uuf. S wird finschter. Es Mami stämmt iire kolossale Buschiwaagen ins Abdäil yyne.
De bisch jo en aastäändige Mensch. Doorum machsch däm Unghüür au sofoort Blatz – aso, em Waage, nit em Mami! Graad uuse gsäit, de luegsch halt, as nit under d Reeder chunnsch.
Vo wyttem muschterisch die Gutsche. So wie die Bännen usgseet, chönnsch de Schlitte sicher zum Dauche bruuche, oder zum ene Hängegleiter umboue und über d Sahara schwääbe. Im Winter chönnsch mit däm Waage sicher Schnee schnütze. Und im Summer in es Wigwam verwandle.
S Buschi hett mit chlyynen Äugli, ganz vergelschtered uus däm riisige Fuerwärch güggelet. Es hett äim richtig läid doo. So verloore.
Do muesch di jo nit wuundere, as die Bääbeli, wenn sie denn äinisch
grooss syy, vom en «Off Roader» dräume in dr Landschaft ummefuerwäärche. Me hett se jo glyy an söttigi Dimensione gwöönt
verchlöpfe = erschrecken
Bänne = Auto
vergelschtered = verstört
fuerwäärche = fuhrwerken
