Dr Gscheiter git noo, au wenn me mängisch e chlyy noochehälfe muess.
Also. Do isch äin im ene hööchen Amt und will jo äigedlig numme s Bescht für alli – halt au für sich und si Frau.
Jetz isch halt das, wo für iin s Bescht isch, nit immer au s Bescht für s gmäini Fuessvolch. Und wenn die merke, as äin mit ene will dr Netti mache, isch dr Zapfen ab. Es wäärde Schlötterlig uusdäilt und s wird im Züügs ummegwouelet. Däm im hööchen Amt wird äis ums ander Mool s Gurli gfiengget.
Jetz verschrickt aber dä uf em hööche Ross und merkt underäinisch: Do hilft jetz alles Salben und Schmiire nütt me.
Und jetzt cheemt äigedlig dr Momänt, wo dä dört oobe sett merke, as es esoo nit goot. Aber umsverworgge will er syy Grind duurestiere. Bis iim äin säit, es weeri jetz besser, er würdi noogee.
Mängisch isch halt nit dä, wo noogit dr Gscheiter. Näi, mängisch isch dä dr Gscheiter, wo diisem säit, as er setti noogee.
Netti machen = verarschen
Schlötterlig = Beleidigungen
wouele = maulen
