Fertig Dürmli bout oder Liedli gsunge. Jetz wird d Dütsch gleert.
Es isch dr blutti Waan.
Öb dyys Buschi überhaupt richtig cha reede, cha dä Luuszapfe scho Hochdütsch. Denn gäitschd di allwääg dyy Pfuuderi nümme mit bä, bä, aa, näi, dä cha denn schon e richtige Satz in gattligem Hochdütsch babble.
Nümme Bluttimuus, Schläckstängel, Nuggi und so wytter. Fertig luschtig. Jetz bildisch mit dyym Buschi Schachtelsätz, nimmsch s Pronom – mir häi no Fürwort gsäit – duure, oder de brobiersch iim dr Dativ byyzbringe.
Käini Määrlibüecher me. Die nöischti Uusgoob vom Duden muess aane. Du verzellsch käini Guetnachtgschichtli me. Käi häile, häil Sääge. D Präposition, dr Akkusativ und d Konjugation wäärde jetz zum Yyschloofe vom Buschi aagwäändet.
Ich fröi mi jetz scho, wenn mir dr Göttibueb, wo jetz zwöi isch, dütsch und dütlig säit, was er gäärn uf e Geburtsdaag hätti. Eh, zum Geburtstag, natürlich.
blutt = nackt
öb = bevor
Bluttimuus = Nacktes Kind
