Wie macht dä das eigentlich?
Immer wenn irgend nöimen en Hundsverlochete gsi isch, chunnt das dr neecher Daag mit eme Bild in dr Zyttig. Und de chönnsch hundertprozäntig sicher sy, uf dene Fotteli glüürled di immer dr glyychlig Regierigsroot aa. Mit grossen Augen, wo usgseije, wie Löcher im ene ryffen Ämmedaalerchees.
Wärden nöime zwöi Meersöili kloont – dä Regierigsroot isch derby. Aso, as mir is richtig verstöönde. Nit bim Kloone, numme bim Fottele. Sygs an eren Eröffnig vom ene Laade mit biologische Windle – dä Regierigsroot isch derby. An dr GV vo de Gramper, bim ene Glas Wyssen an ere Bilderusstellig oder sünscht em en Empfang – dä Regierigsroot isch derby.
Öbbis froogen mir öis allemool, wenn mir die Foteli aaluege: Woorggt dä Regierigsroot de änggchnüppled Grawattechnopf ächt nit?
Hundsverlochede = unbedeutender Anlass
aaglüürle = entegenblinzeln
Gramper = Geleisearbeiter
