Letscht Wuche häi e huffe Tschugger, zääme mit emene Super-Puma, de Lotterbueben am Harasselauf zümftig d Hüener yydoo. Der Clausewitz hätt an deere militärische Mäischterläischtig sicher e Soufröid ghaa.
Löie mir dr Clausewitz aber lo rueie.
Ich haa nämmlig e chlyy Chummer, will miir z Sissech jo hütte Banndaag häi. Doo wäärde jo au «Harasse» ummedräit und e huffe drunke. Und denn gits no settigi, wo mit emene Bier in dr Hand umme laufe. Aber näi au!
Jä. Muess me jetz Schiss haa, as underäinisch d «Barrakuda», d Sonderäinhäit vo dr Baaselbieter Polizei, uus em Gebüsch seckled, öis alli phäckled und drei Moonet in d Chischte gheit?
Also. Wenn diir die neecher Wuche nüt vo mir ghööred, wüssed diir jo, won ich bii.
Lotterbuebe = sittlich haltlose Männer
phäckle = verhaften