Soo. Jetz müesed der sälber z schlaag choo. Das isch my letschti Kolumne in Oberbaselbieter-Dütsch in deere Zyttig. Aagfange han ich vor 16 Johr, oder anderscht gsäit, won ich no barfiss und mit offenem Hooseschlitz hinder der Muusig dryygsprunge bi. S goht wie allewyyl, scho glyy chunnt wiider en anderi Chue und schysst non e gröössere Blätter. Ich ha brobiert in myyne Kolumne nit z fescht achtspännig yyne z fahre, dinne z chehre und erscht no mit der Gäissle z chlöpfe. Ich ha au nit über jeedi Hundsverlochete gschriibe oder bis d Schwaarte kracht hed. Aber. Dänket draa: Chinder und Naare sääge d Woored. In däm Sinn: Häits guet und blyybed gsund und buschber.
Chueblätter = Kuhfladen
Hundsverlochete = belangloser Anlass
buschber = munter
