Scho in der dritte Klass isch klaar gsii: Ich hüüroot äinisch s Lyysebeet. Das isch guet gange, bis in der föifte Klass e sone Lyyri nöi zu öis in d Klass choo isch. Vo dört aa het d Lyyse numme no Auge für dä gschniigled Schnööri ghaa. Für mii isch vo dört aa klaar gsii, das isch e Verschwöörig. Ich haa s Gfüehl ghaa, die ganzi Wält häig sich gege mii verschwoore. Sit ich aber erwachse bii, glaub ich nümmen an Verschwöörigstheorie. Daas im Geegesatz zue villne Dilldappe, wo hütten efange duraane e Verschwöörig vermuete.
Lyyri = Langweiler
Dilldapp = ungeschickter Mensch
duraane = überall
