Ich bi ufere Wanderig im Wald. Schöön gmüetlig. Underäinisch, will ich allwääg doch nit so gmüetlig gloffe bii, daucht vor mir e Frau uuf mit emene Hund. Nooneme Cheer fang ich mii a frooge: Darf ich jetz as Maa, in Zytte vo #metoo, im Wald äifach enere wildfrömde Frau hindedryylaufe? Ich nimm drum lieber die nechscht Apbiegig, obwool ich gar nit dört duure ha welle. Soo duuret my Wanderig anderhalb Stund lenger und ich hätt mii bim e Hoor verloffe. Was my Frau gsäit hed, will ich so spoot häichoo bii, wäi mer an deere Stell nit erörtere.
Cheer = Weile
bim e Hoor = beinahe
