«Im Hause muss beginnen, was leuchten soll im Vaterland». Dä Spruch vom Jeremias Gotthelf isch miir z Sinn choo, won iich daas ghöört haa vo deere UBS-Sekretäärine-Jumpfere. Sii hed zää Joor lang über e Million Franke verjuheid. Mit Gäld, wo nit iire ghöört hed, hed sii Chläider, Schmuck, Schöönhäitsobberazioone und düüri Ferie zaalt. Die üble Chrämpf syy uffgflooge und sii hed vor e Richter müese. Dört isch sii aber freigsproche worde. Wer jo no besser, die armi Hutte hätt in d Chischte müese. Schlussemänd het sii nöime gleert, wie men am beschte frömds Gäld verbulfered.
juheie = prassen
Chrämpf = Machenschaften
