Ou, jetz bin iich glyych e chlyy verchlöpft. Erschtens, will der Baaselbieter Seckelmäischter der Bättel aanegheit. Daas hed mii weeniger schlimm dunkt. Vill schlimmer isch gsii, as äimool mee d Zyttige tschuld selle syy, as em Finanzminischter der Chraage blatzt isch. Schnäll han iich alli myyni 329 baz-Kolumne duuregluegt, öb iich ächt em Seckelmäischter au äinisch an Chaare gfaare bii. Glück ghaa. Iich haa nie öbbis Boodebööses über iin gschriibe. Soo chan iich ooni es schlächts Gwüsse Wienecht fyyre.
Iich wünsch öich allne, as diir daas au chönned.
der Bättel aanegheie = ein Amt im Unmut abgeben
boodeböös = sehr böse
