Darf dää, wo muess sääge, was d Baaselbieter Tschuggerei der ganz Daag macht, flueche? E gueti Froog!
Es macht sich halt scho nit guet, wenn dää, wo bi de Bolizischten ooni z staggele cha reede, im Züügs umme schimpft. Guet, das macht dä braavi Maa äigedlig au nit.
E chlyy gfluecht häig er. Bim Handballspiile. Und daas cha me jo verstoo, wenn me wäiss, wies amene son e Spiil zue und hääre goot. S wird äim s Höggli gstellt. Oder e Finger ins Aug drückt. Velicht hed äin öisem Altherre-Spiiler aber au numme syyni bomaadige Hoor vertschuppled. Und daas hed halt der Bolizeisprächer nit mööge verlyyde.
Nach däm Aplöscher hed är denn schyyns em Schiidsrichter e baar Schlööterlig aaghänkt. Nüt schlimms. Daas, wo halt jeede Spiiler – syyg daas äin vo der Schrooterei oder e junge Burscht mit Migrationshindergrund – esoo säit, wenn er mit em Schyyri unzfriiden isch.
staggele = stottern
Aplöscher = Vorfall
