Iich bii schon e chlyy verschrocke, wo dr Ooberdurner äismools säit, jetz hoolt jeeden e Moosgummiring! Moosgummiring? Won iich daas ghört haa, han ich zerscht müessen an e «Bibi-NUK dental» – Byssring dänke. Joo. Es hed scho der äint oder ander vo de Durner, wo nümm so gueti Zeen hed. Aber müesse miir jetz in der Durnstund bartuu – nääbe de Muskle – au no d Zeen und d Bilgeren uuf Vordermaa bringe? Wo der Ooberdurner ghöört hed, as ich öbbis vo Schuelzaanpflääg vor mii aane brummele, hed är gmäint, iich syygi e Duubel. Dr Ring syygi nit für z druufummezbyysse. Daas syygi e Wurfring. De döige miir jetz enander süüferlig zuewäärffen und miir Dilldappe settenen denn uuffoo. Ahaa, han iich gmäint! Und allwääg hät är no gärn gsäit: Vo äim, wo scho lang käini Milchzeen me häig, dörft men e chlyy meer Sachverstand erwarte.
äismools = plötzlich
Dilldapp = ungeschickter Mensch