Soo säit me de Chilchbäärgger. Daas, will sy aagäblich spaarsaam, oder no schlimmer, gyzig syge. Jetz isch aber fertig mit gyzig. Jetz isch nämmlig uusbrääglet z Chilbrg oobe. Will sy niemer finde, wo, politsch gseh, der Netti macht, wäärde sy vo Lieschtel uus zwangsverwalted. Daas bedüted, as sy im äigene Saft schmoore und nüt me z sääge häi. Soo chunnts uuse, wenn mer alsfott meh deere häi, wo wüsste, wie mes (besser) miechti, aber käine oder käini Fiduz hed, zum s Rueder überneh. Wie hed der Berner Schriftstelle und Pfarrer Kurt Marti (1921-2017) im Johr 1967 scho gsäit:
wo chiemte mer hi
wenn alli seite
wo chiemte mer hi
und niemer giengti
für einisch z’luege
wohi dass me chiem
we me gieng
Stäibräägler = mit prasselndem Geräusch schmoren, braten, rösten (zum Beispiel bräägledi Härdöpfel)
Chilchbäärgg oder Chilchbrg = Kilchberg, mit rund 170 Einwohnern die kleinste Gemeinde im Baselbiet
Fiduz = Lust
