E Kolleeg vom Noldi vom Chlöpfgatterhof isch Cheeser. Und dä hed ihm do letschti öbbis verzellt, wo der Noldi grüüslig erhelcht hed. Öb er wüssi, hed der Kolleeg der Noldi gfroggt, as es Analogchees geebi? Näi, hed der Noldi gmäint, är ässi numme richtige Chees. Richtig soo, hed der Kolleeg gsäit. Aber s Beschti, fahrt er wytter, syygi, as d Veganer früehner dä künschtlig aanepflüümlet Chees nit gässe häige. Sit aber vegan uf der Blaschtigverpackig steechi, gieng dä Chees ewägg wie warmi Weggli. Daas sell no äin verstoh, brummlet der Noldi und der noo gsäit: «Früehner, won e baar Schlaumäier d Milch mit Wasser gstreckt häi, hed me däm Pansche gsäit.»
grüüslig erhelche = sich über die Masse aufregen
Analogchees = auch Kunstkäse, Käseimitat oder Käsesurrogat, hergestellt aus pflanzlichen Fetten, pflanzlichem Eiweiss, Stärke und bestimmten Zusatzstoffen.