Ich haa der Lääserbrieff in der «Volksstimm» es baar Mool müese lääse. Dä glöibig Maa, wo syyni Gedanke der Öffentlichkäit daargläit hed, hed under anderem übere Heergott gschriibe. As es Lüt geebi, wo sich wundere, as öise Gott dä schützlig Chrieg in der Ukraine zuelöi und nit verhinderet häigi. Derbyy vergässe die Mensche, soo der Lääserbrieff-Schryyber, as me sich mit söttigen Überleggige über d Souveränidät vom Liebgott erheebi. Doo stecki nit Gott, sondern e dunkli Macht, nämmlig der Höörnlimaa, derhinder. Drum bätte der Paabscht und villi anderi, as das Gemetzel in der Ukraine äntlig uufhört. Numme. Wäärend die Mensche in guetem Glaube bätte, goht läider der Chrieg wytter.
Döihänker oder Höörnlimaa =Teufel
schützlig = scheusslich
