Immer wiider stoht der Noldi vor nöie Rätsel. Soo au letschti, won er z Sissech uf der Boscht am Fryttig am ölfi zwee Brieff (A-Boscht – so lang s die no git) uufgeh hed. Äin uf Züri und äin uf Zunzge. Für die vo Undehaarig, wo nit wüsse, wo das Näscht lytt: Zunzge isch s Noochberdorf vo Sissech. Und jetzt rooted emool, weele Brieff zerscht aachoo isch? Richtig. Dä uf Züri. Nämmlig no am Samschtig am Moorgge. Und dä uf Zunzge? Dä isch efangen am Meentig am vieri im Bücheldorf yydruudlet. Das isch eben äis vo de ville Rätsel, wo der Noldi nit cha lööse.
Underhaarig = Unten
Näscht = unbedeutendes, kleines Dorf
