Es isch wie allewyyl. Fasnecht bedütet under anderem – Mählsuppe. Soo. Und jetz wird s schwiirig. Doo no äisch für alli Suppechöch zum Mitschschryybe. Näi. Mählsuppe häisst nit, as men es Päckli aarüehrt. Mählsuppe betüdet – Choche! As me Mähl sorgfältig und süüferlig röschted, ohni as d Chuchi foht afo brenne. Denn chunnt zümpftig Rootwyy und Wasser, Kalbsfüess, Ochseschwanz, Ziibele und Salz und Pfäffer derzue. Richtigi Chöchynne oder Chöch fönge am Fasnechtssunndig s Mähl afo röschte. Denn loot me d Suppe bis am Meentigmoorgge lo chöcherle. Daas isch e Mählsuppe. Alles anderi isch e besseri Soudränki.
süüferlig = ordentlich
Soudränki = Schweinefutter
