Diir kennets. D Umhangläiter, oder wie men umgangssproochlich säit: d Vorhangringli. Wenn me der Umhang nämmlig z fescht zrugg schränzt, chas bassiere, as men äis vo deene Ringli us der Vorhangschiine rysst. Soo. Und weeles Ringli ryssts uus? Richtig. Immer s Hinderscht. Und daas bidüted, as me der ganz Umhang mues aabeneh und denn, jeh noo Modäll, wiider mues gege 138 Umhanggläiter in d Vorhangschiine yynechnüüble. Noo öbben ere halbe Stund hesch efang 20 Ringli gschafft und de hesch s Gfühl, as d Äärm am Apgheie syy. Ich ha das Brobleem äifach glööst. Ich ha der Umhang – ohni Ringli – in der Chläidersammlig entsoorggt.
Umhang = Vorhang
bidüted = bedeutet
