Scho verwunderlig. Die glyyche Bäizer, wo non em «Lockdown» bim Staat die hohli Hand gmacht häi, will sy ihri Knille häi müese zue haa, wehre sich hütt gege s staatlich verordnete Corona-Zertifikat. Au z Sissech gits son wiiderhoorigi Bäizere. Sii, mit diräktem Droot zum liebe Gott, säit under anderem as Entschuldigung: Me mues numme bätte und Gott in sich haa, denn chunnt alles guet. Das hed me schon emool gmäint. Denn nämmlig, wo an der Pescht zwüsche 1347 und 1353 gschetzt zwüsche 20 und 50 Millione Möntsche gstorbe syy. Dennzmool hed men au gmäint, bätte würdi hälfe. Bis me gmerkt hed, as au d Pfärrer an deere Süüchi apsäärple. Me setti mende, as mer hütten e Rung wytter syy.
wiiderhoorig = wiederspenstig
säärple = dahinsiechen
