Der Noldi vom Chlöpfgatterhof hed lang gschwiige. Jetz hets ihm aber der Nuggi uusegjaggt. Er hed loosgwättered, wie äin, wo baarffis und mit offenem Hooseschlitz hinder der Muusig dryygsprungen isch: «Alsfott meh wäi miir Minderhäite sääge, was ich z mache oder z dänke haa.» Soo. Und jetz isch der Noldi so richtig in Fahrt choo. «Me sett dene eewige Besserwüsser, wo allewyyl in der Minderhäit syy, sääge, wie öisi Demokratie funktioniert», cholderet der Noldi wytter. Er müesi sym Koleeg Blääsi, wo zwaar e Linggen isch, rächt geh, wo säägi: «Gunne und rächt häi die, au wenn sii nit rächt häi, wo an der Urne meh as 50 Prozänt vo de Stimme hoole – und nit d Minderhäit. Au wenn die no so lut brüehlt.» Soo isch daas und nit anderscht.
baarffis = barfuss
choldere = poltern
Blääsi = Blasius
