Öbbe 30 Chatzebuuseli tiigere uf emene Hof im Oberbaselbiet umme. As sy chönne überlääbe – ich nimm aa, der Buur serviert ene käi eedels Chatzefuetter – frässe die arme Dierli alles, was ihne vor d Schnauze chunnt. Jetz isch d Uufreegig zue Rächt grooss, will die Büüsi nit numme muuse, sondern au Vögel, Höidächsli oder Blindschlyyche frässe. Öbbis wird aber vergässe, wenn me vo dene ville Chatze reedet, wo in de Gäärten ummeströie. Dir settet emool my Noochber ghöre, wenn er am Raasemäien isch und albott in e Chatzegaggi tschalpt.
Chatzemälcher = Katzenfreund
Höidächsli = Eidechse
