Näi. In sym Alter löi er sich nümm lo jääble. Drumm häig er sich au nit lo impfe, hed der Böbbi allne verzellt, wos häi welle, oder eben au nit häi welle wüsse. Äinewääg. Der eehemoolig Schryynermäischter isch die letscht Wuchen in sy Lieblingsbäiz wiider äinisch gon es Bier drinke. Bim Yynechoo hed er sich gwunderet, as zwüschen allne Tisch e Plexiglaasschyybe stoot. Der Böbbi hed der Bäizer aapfuured und gwouelet, was denn daas für e Säich syygi mit deene blööde Apschrankige. Me chönn jo nit emoll richtig schwätze zääme. Der Bäizer isch rueig bliibe und hed däm Muulichäib erkläärt: «Wäisch Böbbi. Das müese mer mache, will sich nit alli wäi lo impfe.» Der Böbbi hed e Schluck gnoh und für e Räscht vom Oobe d Gügge ghalte.
jääble = hetzen
Böbbi = Jakob
