Soo, wies uusgseht, chömme mer die Süüchi langsaam in Griff über. Drum isch s an der Zytt, danke z sääge. Vor allem deene, wo an d Samschtigs-Demonstratione für Freihät und Egoismus uf d Strooss syy. De Dräichler in de Sennechutteli und de Chrummen im Muul, wo gege die vom Staat verordnete Coronamassnahme gläärmidiert und denn am Meentig wiider unschiniert s Subventionsformular vo ebe däm Staat usgfüllt häi. De sälbschternannte Schamanyyne und Schamane, wo stundelang uf d Schamanedrummle ghaue häi. De Fahneschwingeryyne und -schwinger, wo wie verruckt im Züüg umme gwäit häi. Allne deene ohni Maske oder deene, wo wüsse, as Impfen nüt nützt. Äifach allne, wo alles wüsse und allewyyl rächt häi. Allne deene – nimm ich emool aa – häi mer z verdanke, as die Süüch am Verschwinden isch. Oder?
Süüchi = Seuche
läärmidiere = lärmen
