Wäge zwee halbwüchsige Badroon, wo z Weil am Rhein voreme Yychauffscenter mit ere Byschtoole ummegfuchtlet häi, hed d Bolizei müesen uusrücke. Glyy häi d Tschugger aber gmerkt, as die zwee Möchtegärn-Cowboy nummen e Chäpselibyschtoole by sich ghaa häi. D Bolizei hed die Bischtoleros nit mitgnoh. Hed aber, wie s im Bolizei-Communiqué häisst, «mit den beiden ein sensibilisierendes Gespräch geführt.» Also. Wenn der bi öis vor em Milchhüüsli so äine mit ere Flinte gsäiet stoh. Nit schiesse. Schwätzed mit em. Er goht allwääg go s Obligatorisch schiesse. Oder an Banndaag (das aber eenter nit, im Momänt).
Badroone = Bursche
Chäpselibyschtoole = Spielzeugpistole
