Zää Stund häi die letscht Wuche d Nationalröötyyne und d Nationalrööt der Schnuurepflutteri ghaa. Die Gaalaffe und Schnäpfe häi ununderbroche über Corona gschwaafled, gwaaschled und gschnattered. Jeedi und jeede isch jo schlussemänd uf däm Gebiet e Spezialischtyyn oder Spezialischt. Guet. Uusechoo isch am Schluss nüt. Es isch alles esoo bliibe, wies der Bundesroot voorgschlaage hed. Wär wäiss. Velicht häi öisi Volksverdrätteryyne und Volksverdrätter au gar nüt welle sääge, nummen e chly blaudere. Will iine bewusst worden isch, as es sii bi der Bewältigung vo der Corona-Kryyse nit würklig bruucht.
Schnuurepflutteri = Schwatzsucht
Gaalaff = Schwätzer
Schnäpfe = Schwätzerin
schwaafle =schwatzen
waaschle = undeutlich schwatzen
schnattere = viel schwatzen
