Me setti jo mäine, as z Äisiidle nummen Äisiidler het. Nit so am «Sühudiumzug» vom letschte Meentig im Dorf vo der Schwarze Madonna. An «Sühudiumzug» hets nämmlig numme so gwimmlet vo Äi-, Zwee- oder Villsiidler. Z mitts drinn e Mitti-Nationalroot. Klaar. Dorum häisst die Partei allwääg au nöi Mittipartei. Er beröi nüt, säit dä vom Volk gweelti Maa. D Fasnecht sygi halt au so öbbis wien e Virus. Numme. Hed dä gueti Maa nit öbbis verwächsled? Fasnecht und gstööberet duur d Geegend z joggle sy zwee verschiideni Sache. Es Vorbild wer denn ebe in der Mitti.
Äisiidle = Einsiedeln
gstööbered = betrunken
joggle = wackeln gehen