Bis noonig so lang isch uf em Yychauffszeedeli, wo miir my Frau amme mitgit, äifachs Züüg gstande. Anke, Voorässe, Mangled oder Wäiedäig. Jetz isch alles e chlyy komplizierter. Jetz gseht s Yychauffszeedeli wien e Charte vomene Orientierigsläuffer uus. Soo chumm ich miir ämmel voor. Es isch nämmlig nümm ganz äifach uusezfinde, wo me waas, und in weelem Laade no darf yychauffe. Es Byspiil. Mues ich e nöi Suppeschüssle haa, chumm ich die nummen über, wenn ich jeede Daag Suppen iss. Jetz hoff ich numme, as niemer mitüberchunnt, as mir numme jeede zwöite Daag Suppen ässe.
Voorässe = Ragout
Mangled = Mangold
jeede Daag = täglicher Bedarf
