Ich bi um en Illusion ärmer. Nüt isch gsii mit mym Nöijohrswunsch an die Baselbieter Politikerynne und Politiker, sy selle doch bitte zerscht überlegge, bivor sy ammen in d Taschte haue. S Johr isch no käini vierzäh Daag alt, gohts Gstürm scho wiider loos. D Mohlermäischtere mit em roote Tschuppel hed öbbis Irritierends über d Secondos gschriibe. Sii selle nämmlig mitschuldig syy an de hööche Corona-Fallzahle. Denn isch aber es Ooberwätter über d Frau Nationalroot yynebroche. Im Internet isch gfüürdüüflet worde. Me hed der aarme Hutte – ämmel virtuell – d Fäckte gstutzt. Also no äinisch: D Finger ab der Taschtatur, überlegge und denn erscht afo schryybe. Denn chunnts mäischtens guet.
Tschuppel = eigenartige, farbige Frisur oder wirres Haar
Ooberwätter = Unwetter
D Fäckte stutze = jemanden zurückbinden, damit er/sie nicht ständig vorprellt
