D Giuseppina isch by mer uf Bsuech gsii. Sii isch 83, chunnt vo Frascati (Provinz Latium/Lazio) und isch en usgezäichneti Chöchi. Nooneme Rung han ich gmerkt, as d Nonna öbbis uf em Härz hed. Joo, hed sy gsäit. «Gofferdoori», hed sy aagfange. Sy häig inere Zyttig es Rezäpt gseh, vo vegane Spaghetti carbonara. Mit gräucheretem Tofu und Soja-Schlagcreme. Ihre häigs fascht s Härz abdrückt, wo sy das glääse hed. Sii häig in ihrem Lääbe schon e mängi Spaghetti carbonara zueberäitet. In e richtigi carbonara ghört Pancetta, Pecorino, Äi und gmahlene schwarze Pfäffer, säit sy wytter. Alles andere isch velicht Spaghetti, aber sicher käi carbonara. Also, hed sy gsäit, jetz schon e chly lütter: Basta mit Schyssedrägge. Höred uuf, tradizionelli Gricht z verliederle. Basta!
Gofferdoori oder wie mir würde sääge: gopferdoori = verdammt noch mal
verliederle = verhunzen
