Wenn isch öbber e Schelm? Isch men e Schelm, wenn me zum Byspiil brobiert mit Fasnechstgäld im Chreemerlaade der Föifermocke oder der Chätschgummi z zahle? Oder wenn me bim Jassen oder bim «Eile mit Weile» bschysst? Schwiirigi Froog, gälled. Aber die no vill schwiirigeri Froog isch, wie me deene säit, wo wääge der Corona-Kryyse Gäld vom Schwyzer Staat wäi, sich aber hindeduure löien e Bonus uuszahle. Bi deene Schnöösel chunnt mer my Muetter z Sinn, wo amme gsäit hed: «Gyzgnäpper, wo der Hals nit gnueg voll überchömme.» Oder äifacher gsäit: Laaferibuebe und -mäitli.
Chreemerlaade = Dorfladen
Chätschgummi = Kaugummi
Gyzgnäpper = Geizhals
