Wo der Noldi vom Chlöpfgatterhof no buured hed, hed er sich abbe ufgreggt über die ville Beamte, wo z Lieschtel unde immer wiider nöi Sache ushecke. «Es hed em Döifel es Oor ap z vill Staatsaagstelli», hed er amme gwoueled. Jetz aber, won er in der Zyttig glääse hed, as die Jungi SVP Schwyz d Bundesbreesidäntin will aazäige, isch der Noldi doch e chlyy ins Grüble choo. Hets ächt – under anderem – wääge däm so vill Beamti, will efangen e jeede und jeedi mäint, er/sii müesi en Aazäig mache. Schyssegal, wie ussichtsloos.
abbe = manchmal
em Döifel es Oor ap = enorm
