Ich has jo allewyyl gsäit. Numme het mers niemer glaubt. As chlyyne Bueb bin ich e zimmlige Brüeli gsii. Hets amme Birchermüesli zum Znacht geh – ich ha die schlyymigi Bappe soumeessig ghasst – han ich wie vom Mässer gstoche im Züüg ummebrüelt. Soo häi d Noochbere gwüsst, em Chnüderi wird es Läid aadoo. Jetz liis ich in der Zytig: «Schreien ist wichtig für die Persönlichkeitsentwicklung.» Das säit e Logopädin – und die mues es jo wüsse. Jetz wüsset dir au, worum ich sone … aber löie mer daas.
Bappe = Brei
Chnüderi = kleiner Junge
