Der Köbi hed siibe Wuche lang yygchauuft. Für d Öltere und d Ääni. Die Yychaufferei isch für dä Burscht grad e chly e nöi Wält gsii. Är, wo süscht mäischtens Fertigsuppe und –sosse, vorbachni Pizza mit Imitations-Mozzarella oder furzdrocheni Rossfleisch-Lasagne boschted hed. Unglaublig, was es doch alles zum Chroome git, hed der Köbi dänkt, won er amme der Yychauffszeedel aagluegt hed. Aber er hed allewyyl alles richtig häibrocht, was d Groossmuetter und d Öltere bstellt häi. Nummen äinisch isch er ins Grüble choo. Denn nämmlig, wo s Groosi e Ruugel Schwartemaage hed welle. Der Köbi hed aagnoo, as d Ääni e Jux hed welle mache mit ihm. Drum hed är äifach gsäit, es heebi bim Metzger käi deere Schwartemaage ghaa.
Ääni = Grossmutter
chroome = kaufen
