Sit über 600 Johr schuene d Lieschtler Manne am Meentig vor Uffert de Gränzstäi nooche. Banndaag säit me däm und het e langi Tradizioon. Und jetz daas. Hüür fallt dä Umgang nämmlig uus. Wäge der Süüch, wo no allewyyl ummen isch. Käi Schüblig. Käi Muff. Käi Schwarzbulverdampf. Ungmach. Groosses Ungmach. Öbbis goht aber in dene schwere Zytte vergässe. D Fraue. Nit gnueg, as d Manne wääge der Coronakryyse dehäi ummetiigere. Jetz stolpere die, wohrschyynlig stäihässig und mit wäälem Fliider am Huet, de Frauen am Banndaags-Meentig au no ins Kaffichränzli. Joo. Banndaags-Kaffichränzli säit me däm und het au e langi Tradizioon.
Ungmach = Beschwernis
Muff = Spezielle Glasgrösse (4 Deziliter) für Weisswein
