Samschtig. Gegen en Oobe. Äi Ruei. Nummen es Dannemöisi, z usserscht uf emene Nascht vo der Haaselstuude, git es Gratis-Freiluftkonzärt. S Hackbüffdegg isch schöön aanebüscheled uf em Grill glääge und hed friidlig vor sich aanebröötlet. D Guttere Barolo isch sit ere Stunde offe und der erscht Deguschtations-Schluck hed e Güeti, so as hätt äim es Ängeli der Hals apbrünzlet. Grad wo d Frau und ich häi wellen afo ässe, hed der Noochber oobedraa der Fadeschnyyder in Betriib gnoo. S Möisi isch verschreckt dervoogflooge und s Büffdegg uf em Däller hed e Gump gnoh. Non ere Stund isch d Matte gmäit und mir zwöi ryff für s Naarehuus gsii.
Büffdegg = Rindersteak oder Rinderlendenschnitte
Dannemöisi = Tannenmeise
Naarehuus = Irrenanstalt
