«Es mues e Sprängkandidat aane», hed der Noldi vom Chlöpfgatterhoof gwouelet. Und die andere häi gwüsst. Wenn der Noldi am wouelen isch, gültets ärnscht.
Was isch bassiert?
Der Noldi isch Mitgliid bim Chüngelizüchterveräin «Rammler und Hattle». Ihm, won e Raaglete Chüngel uf em Hoof ghaa hed, isch äis vo de Veräins-Voorstandsmitgllider uf e Sack gange. Es isch äine gsii, hed der Noldi ämmel gmäint, wo d Aarpet im Voorstand nit richtig gmacht hed. Son e halbe Grüene mit lange Hoor. E Zuezoogene. Aber no schlimmer. D Frau voonem isch Veganeryyn gsii. Daas goht natüürlig gar nit, hed der Noldi gfunde.
So hed är hindenumme gegen dä Ungliebti afo Züüg ummeverzelle. Es isch nit alles wohr gsii, wo der Noldi under d Lüt brocht hed. Aber em Noldi isch klaar gsii: Dä mues ewägg. S bescht isch allwääg, wenn me bi de nächschte Voorstands-Wahle e Sprägkandidat ufstellt. Jetz isch das aber gar nit so äifach gsii, e gäignete Maa z finde. Natüürlig. E Frau isch uf käi Fall in Froog choo. Chüngelzüchte und Fraue goht gar nit, hed der Noldi uuseposuunet. «Die selle es gattligs Chüngelragout mache und nit welle mitreede im Veräin. Das isch Sach vo de Manne.» Genau. So isch das.
Glyy änisch hed der Noldi aber müese feschstelle, as das gaar nit so äifach isch, e Dumme z finde, wo noo der Pfyffe vom Noldi danzt. Deere, won e groossi Schnuure häi, deer gitz e Huffe. Äin aber, wo will aane stoht, deere hets nit vill ummeghaa. Aber nooneme Rung isch der Noldi doch no fündig worde. Es sich der Baschi, der Suun vom Seppedooni vom Chrüzchlütterhoof gsii. Nit grad der Hellscht, aber au nit der Dümmscht. Äine, wo me no cha forme, isch der Noldi überzügt gsii.
Es hed natüürlig schon e chly Ufruer geh, wo sich an der Generalversammlig vom Chüngelizüchterveräin non e Zuesätzliche zur Wahl in Voorstand gmäldet hed. Jä guet, häis sich die mäischte dänk gsäit. Jetz gits änlig emool en Uuswahl. Der Noldi hed ghäimi Wahl verlangt, was noonere längere Diskussioon au aagnoo worden isch.
Noodäm alli ihri Stimmzeedel apghe häi isch zellt worde. Lang zellt worde. Scho daas isch em Noldi gspässig vorchoo. Denn. Noonere Eewigkäit, hed der Drougi, er isch zum xte mool Wahlbreesi gsii, s Apstimmigsresuldat bekannt geh.
«Nöi im Voorstand isch der Baschi», säit der Drougi mit ärnschter Zwänzgapachtischnuure. «Apgweelt isch – läider – der Miggel.» Em Nodli stockt der Ootem, won er daas ghört. Nit der grüen Gaggalaari isch apgweelt. Näi. Der Miggel hets bräicht. Dä wo scho lang im Vorstand sich und sy Aarpet meh as rächt macht. Dä wo die schöönschte «Mecklenburger Schecken» im Stall hed. Ou, dänkt der Noldi, de Schuss mit em Sprängkandiat isch hinden uuse. Er hed sich gschwoore, nie me, aber au gaar nie me hindeduure z intrigiere. Das well är zuekümpftig wiider de Politikeryyne und Politiker überloo.
