Ich bi jo vill in de Bäizen underwäggs, mäischtens aarpetshalber. Guet. My liebi Frau säit albe, das gseech me mir au langsaam aa – ämmel vornefer. Es wird jo vill gjoomeret, ass efangen alsfott meh Reschtaurant der Laade dicht mache. Würklig. Es cha äim jo öbbedie bassiere, ass zwüschen em Bstellen und em Zaale der Bäizer zwöimool gwächslet hed. Worum isch das soo?
Im Service schaffen immer wiider öbbe Burschen oder Jumpfere, wo no käi Lehrstell gfunde häi. Deene säit me denn halt: Gönged e chly in Service go schaffe. Das cha jo nit so schweer syy. Spööteschtens wenn sy äim der Rootwyy yyschänken und s ganz Dischduech versoue, merke sy, ass s Serviere doch nit so äifach isch wie men ihne gsäit hed.
Wies mängisch cha goh, wenn me nit so versiert isch im Umgang mit em Gascht, zäigt das Byspiil: Mer sy vor eme Rung z ölft (numme Manne) in ere Bäiz im Ooberbaselbiet yygcheert. D Servierdochter, oder wie me hütt säit, d Servicefachaagstellti, wo d Bstellig ufgnoo hed, isch glyy ins Schlöidere choo. Wo nämmlig der äint vo öis drei Fläsche Wyy ufs Mool bstellt, hed die gueti Frau, noodäm sy e chlyy noochedänkt hed, d Stirne grunzlet und denn zue öis gsäit: «Gälled. Dir wüsset. Daas isch über zwee Liter Wyy.» My Kolleeg hed ihre zur Antwort gee, ass er das scho wüssi. Und es syg allwääg sogaar esoo, ass drei Fläsche nit würde länge. Richtig. Wo die drei Guttere leer gsii sy und mir no zwoo häi welle noochebstelle, hets vom glyyche Wyy numme no äi Guttere gha. S Frölläin hed denn halt zwee verschiideni Wyy brocht und gsäit: «D Scheffi heebi gmäint, ass die beede Wyy fascht glyych syyge.» Joo, häi mer dänkt. Der äint isch vo Nord- und der ander vo Süditalie gsii.
Das isch nummen äis Byspiil, was im Gaschtgwäärb cha falsch goh. Wyteri Sünde sy d Ärpbeeri, wos grüen no draa isch. Ich bi jo zum Ässen und nit zum Ärpbeerirüschten in d Bäiz choo. Denn d Spaghetti Carbonara. Näi. An e richtigi Carbonara ghört käi pampige Määlsoosse. Vorsichtig mues me syy, wenn uf der Mönücharte Fisch und Meeresfrücht aabotte wärde. In ere Bäiz, wo nit so guet laufft, sy die mäischtens dieffgfrooren und müese schnäll, schnäll in warmem Wasser ufdaut wäärde. E wyteri Unsitten isch, wenn der Choch d Salaatsoosse nummen über e Salaat schütted. Oobedruff isch der Salaat im ene Salaatsosse-See versoffen und unden im Däller gsehts us wie in der Wüeschti Gobi. Es isch jo nit so schweer, der Salaat in der Chuchi z mische, mäinti ii. Ganz doll isch der ghackt Beeterli, wo der Choch uf e Dällerrand ströit. Wenn der Däller esoo voor dir stoht und de s erscht Mool richtig yyschnuufsch, muesch achtig gee, ass de wääge däm furzdrochene Grüenzüüg käi Staublungen yyfoosch.
Es gubti non e Huuffe deere Sache, wo äim s Lääben in de Bäize zwüscheduure schweer mache. Aber no goht s Oobeland nit under. Es git nämmlig no Bäizer, wo wüsse, wie mes richtig macht und der Gascht nit as e Bedrohig aaluege. Richtig. Bi deene cheer ich gärn yy.
