Schyyns hätt z Basel selle die erschti Bäiz für Blutti ufdue. D Gescht. D Chällnere. D Chällner. Alli füdleblutt. Öb die in der Chuchi au alli blutt sy, wäiss ich nit. Ich stell mer aber voor, as no zimmlig gförlig isch, ohni Chläider an der Friteuse z stoh. Wohrschyynlig gits au käi Fläisch uf em häisse Stäi.
Won ich das vo dere bsundrige Bäiz ghöör haa, isch mer my Gottebääsi z Sinn choo. Sii hed nämmlig käi Fläisch gässe und in der Wiirtschaft albe zum säälbetsmool no aagläite Servicepersonal gsäit: «Ich numti gärn e Däller blutti Nudle.» Soo ändre d Zytte. Hütte sy statt de Nudle e Däil vo de Chällner und Chällnere füdleblutt.
füdleblutt = splitternackt
Gottebääsi= Patin und zugleich Cousine oder Tante
