S Metzgergwäärb cha ufschnuufe. Vo Amerika – vo woo sünscht – chunnt e nöi Moode. Eehemooligi Vegetarier und Veganer nääme dört jetz s Metzgerbiel sälber in d Händ. Chnätte s Wurschtbräät ohni Maschiine, saage Chnöche und schnätzle Nierli. Daas vo Dier, wo numme früschs Graas gfrässe häi. E gueti Sach. Usser natüürlig für d Rinder. Die wärden no allewyyl apgmuurggst. Will sich so nöimoodischi Süüchene wie der Wind verbräite, gohts allwääg nümme lang und an der nechschte Generalversammlig vom Schwyzerische Metzgerverband säit e Vegetarier, wos duure goht.
Biel = Beil
Bräät = Wurstmasse
apgmuurggse = töten
