Wenn bi öis in der Schwyz nöimen e Schwoobechääfer inere Chuchi von ere Bäiz ummechramslet, isch duzwytt der Döifel los. E chly anderscht gohts doo in der Grande Nation zue und hääre. Noonere Wanderig in de Elsässer Vogese häi mer inere «Ferme», emene Buuregaschthoof übernachtet. Underäinisch, mer sy bim Apéro ghockt, hed men es friidligs Grunze ghört. Und der glaubets nit. Ganz gmüetlig isch e stark übergwichtigi Hängebuuchsou queer duur d Chuchi und d Bäiz drotted. Öb sy au bim Choche mitghulfe hed, wäiss ich nit. Aber es stimmt halt scho: anderi Länder, anderi Sitte.
Schwoobechääfer = Küchenschabe
chramsle = krabbeln
