Trainerhoose

Won ich vom Dood vom berüemte Moodezaar Karl Lagerfeld glääse haa, isch mer es Zitat in Sinn choo, wo dä gueti Maa schyynts emool selli bruucht haa: «Wer Trainerhosen trägt, hat die Kontrolle über sein Leben verloren.» Nit as ich Chläider vom Lagerfeld hätti oder mit de Trainerhoosen ins Dorf giechti. Näi bigoscht. Bi däm Zitat isch mer my Vatter in Sinn choo. Är hed in der Freizytt, fascht numme no der Trainer aaghaa.
Wenn er mit em Hund isch go lauffe: Trainer. Wenn er isch go Syygerette chauffe: Trainer. Sogaar s Wienechtsgschänk, won er für sy Frau boschtet hed: Trainer. S Frölläin im hiesige Chläiderlaade hed amme scho komisch gluegt, wenn der Vatter im Trainer, in der Loodepelleryynen und der Zipfelchappen uf em Chopf im Laade gstanden isch. Woorschyynlig hed die Jumpfere sälbetsmool scho s Gfüehl ghaa, my Vatter häigi e chlyy d Kontrollen über sys Lääbe verloore.
Nummen an Banndaag isch er allewyyl mit Chüttel, Gravatte, fyyne Hoosen und emene Huet mit emene gattlige Mäie druff. Vor allem won är Bürgerroots-Breesi gsii isch. An däm häiligen Aalass hets käini Trainer-Hoose verdräit. Und jetz. Me müesst sich emool vorstelle, der hüttig Breesi würdi in Trainer-Hoose d Mannen am Banndaag begrüesse. Doo wer allwääg der Düüfel loos.
Obwohl. Wenn ich hütt so ummelueg, fallt mer uuf, ass alsfott meh jungi Lüt in Trainer ummelauffe. Natüürlig nit so Trainer, wie se my Vatter aaghaa hed. Är hed allwääg eenter e Nabholz-Trainer dräit. Nit ganz sone gschmäidigi Usrüschtig, wie der Olympiasiiger im Reckdurne vo 1952, der Jack Günthard. Är, aso der Günthard, nit my Vatter, hed in de 70er Johr bekanntlig brobiert, die fuule Schwyzeryynen und Schwyzer vom Kaanebee aabe z beweege. Jeede Moorgge hed er in der Sändig «Fit mit Jack» uf Radio Beromünschter d Lüt zum Früehdurne wellen animiere. Das imene sexi rote Nabholz-Trainer, wo me läider aber nit gseh hed im Radio. Das isch d Zytt gsii, wo nääbenem Nabholz-Trainer s Schwyzer Vivi Kola, die roote Wisa-Gloria-Dreireeder und d Birkestock-Sandaalen en vogue gsii sy.
My Vatter isch nit so sportlig gsii – ämmel im Alter. Und glyych hed er mäischtens e Trainer aaghaa. Wohrschyynlig wils äifach bequeem gsii isch und allwääg nit, wil er sys Lääbe nit im Griff ghaa hed. Guet. D Mueter hed nit immer Fröid ghaa, wenn ihre Maa im Trainer ins Doorff isch. Numme: Der Vatter hed nit so vill Wärt uf d Aaleggi gläit. Hed aber Obacht gee, ass er s Lääben im Griff hed – das notabene mäischtens im Trainingsaazug. Und. Wenn ich hütten eso ummelueg, wär alles in Trainerhoosen ummelaufft, isch er zääme mit em Jack Günthard ehnter so öbbis wien e Trainer-Hoose-Mode-Vorläuffer gsii. Numme. Ich nimm chuum aa, ass alli die junge Mäitli und Burschten in de topmodärne Trainer in aller Herrgottsfrüei Moorggedurne mache.